Դու օրվա մեջ մի քանի անգամ զանգո՞ւմ ես քո տղամարդուն, հարցնում, թե արդյո՞ք նա չուշացավ աշխատանքից կամ կարողացավ ղեկավարի հետ հարաբերությունները հարթել... Հենց հիմա STOP...ար՛ի միասին մտածենք՝ արդյո՞ք ճիշտ է քո տղամարդու հանդեպ այդքան հոգատար լինելը, իսկ ի՞նչ է զգում նա ամեն անգամ այսպիսի հեռախոսազանգերից հետո...Եվ, վերջապես, նա հո երեխա՞ չէ...
Պատրաստեց Գայանե Ասրյանը
Cosmo-հոգեբան Վերգինե Եսայան
Տղամարդը պետք է ազատության սահման ունենա, հոգատարությունը, որը վերածվում է վերահսկողության, անհանդուրժելի է շատ տղամարդկանց համար: Եթե դու զգում ես, որ քո հոգատարության պատճառով լարվածություն է առաջանում հարաբերություններում, ապա պետք է լրջորեն մտածես քո էներգիան այլ տեղ սպառելու մասին... Օրական 30 անգամ նրան զանգելու փոխարեն արի ավելի օգտակար գործով զբաղվենք:
Նախ թող նրան իր իրերի հետ մենակ
Իրականում տղամարդուն պետք է դրդել ամեն ինչ ինքնուրույն անել. դա ավելի մեծ կանացի հմտություն և ճկունություն է պահանջում: Այնքան ժամանակ պետք է նրբանկատ լինել, մինչև որ տղամարդն ինքը խնդրի քեզ օգնել իրեն: Թող նա ինքը քեզ խնդրի, որ սրբիչը կամ վերնաշապիկը լոգարան տանես, քանի որ ուշանում է աշխատանքից կամ գործնական հանդիպումից: Ամբողջ օրը մի՛ վազիր նրա իրերի հետևից հավատարիմ շնիկի նման, այլ հանգիստ, շա՜տ հանգիստ ասա՝ սիրելի՛ս, այն դարակի վրա է:
«Տանել չեմ կարողանում, երբ որ սկսում է երեխայի նման հրահրանգներ տալ ինձ, ուղղակի թքում եմ, չըրխկացնում դուռն ու էլ հետ չեմ գալիս»:
Կարեն, 28 տ.
Մի՛ փորձիր նրա կյանքով ապրել
Կենտրոնացիր աշխատանքիդ վրա , ոչ թե զեկույցդ թողած՝ հարց ու փորձ արա նրան սպասվող ժողովի մասին: Դուք հրավիրված եք խնջույքի, և դու արդեն 5 օր է մտածում ես, թե այդ օրը նա ինչ գույնի վերնաշապիկ պետք է կրի: Սկսում ես նախ բարձրաձայն մտածել, հետո սկսում ես նրա հետ ժամերով քննարկել: Եթե անգամ քո համար շատ կարևոր է և դու իսկապես մտահոգված ես, թույլ մի տուր, որ նա այդ մասին իմանա: Նրա ներկայությամբ ավելի լավ է ակնարկիր, որ պետք է վարագույրները փոխել:
«Շատ կանանց հենց հիմա ես օգտակար խորդուրդ կտամ` ազատ արձակեք Ձեր տղամարդուն, նա այնքան խելոք կվերադառնա, որ անգամ Ձեզ կօգնի ընթրիք պատրաստել և սեղան գցել »:
Արտեմ, 30 տ.
Նրա պատճառով մի՛ մոռացիր ընկերներիդ
Աշխատանք ունես, բազմաթիվ զբաղմունքներ և ազատ ժամանակի խնդիր միշտ կա: Նախկինում այդ ազատ ժամանակը ընկերներիդ հետ էիր անցկացնում, հիմա նրա, իսկ նա պահանջկոտ է, խնդրում է հանդիպել ամեն օր: Մի՛ մոռացիր, որ ընկերները ևս իրենց կարևոր տեղն ունեն քո կյանքում, այնպես, որ նրանց հանդիպելու առիթները բաց մի՛ թող, հաճախ հանդիպիր ընկերներիդ, ու պարտադիր չէ, որ սիրելիդ նույնպես ներկա լինի: Թող քո ընկերական շրջապատը նրա համար լինի քո «առեղծվածային» կողմերից մեկը:
Կրճատի՛ր զանգերդ և հաղորդագրություններդ
Բացիր բջջայինիդ զանգերի ցուցակը ու հաշվիր՝ քանի անգամ է նա քեզ զանգել և քանի անգամ` դու: Եթե քո զանգերը գերակշռում են, ուրեմն ավելի լավ է որոշ ժամանակ չլիցքավորել հեռախոսը կամ չմուծել վարձավճարը: Սա կօգնի քեզ ավելի հազվադեպ զանգել նրան ու աստիճանաբար հավասարեցնել ելքային ու մուտքային զանգերը: Երբ նա գործնական հանդիպման է կամ ընկերների հետ, քո զանգերն ու հաղորդագրությունները կարող են նրան ուղղակի հունից հանել, չափավորությունն այս հարցում առավել քան տեղին է:
Չափից շատ մի՛ հաճոյացիր նրան
Եթե նա իրավաբան է կամ բժիշկ, պետք չէ նրա վրա տպավորություն թողնելու համար անգիր անել Հողային օրենսգիրքը կամ Հիպոկրատի երդումը: Ցույց տուր նաև, որ այնքան էլ հետաքրքրված չես իր մասնագիտական նրբություններով և քեզ գրավում է, օրինակ, ավանդական բժշկությունը կամ իսպաներեն լեզուն:
«Եթե զգում ես, որ այդ հոգատարությունը անկեղծ է, ու սիրածդ մարդն անում է սիրով և գործնական քայլերով, ուրեմն պետք է միայն ուրախ լինես, որ գտել ես քո սիրեցյալին ու խնամակալին»:
Գևորգ, 22 տ.
Նրա համար առեղծվածային եղի՛ր, նոր հետաքրքրություններ փնտրի՛ր
Եթե աշխատանք չունես, ինչը դառնում է նրա վրա կենտրոնանալու պատճառ, ապա որևէ զբաղմունք գտիր, լցրու օրակարգդ, օրինակ՝ կամավորական սկզբունքով կարող ես օգնել կենդանիների պաշտպանությամբ զբաղվող կազմակերպությանը:
«Ես ավելի լավ է՝ իմ ձեռքով սարքած ձվածեղն ուտեմ, քրտնած վերնաշապիկս հանգեմ, քան նա ամեն օր շնիկի նման ինձ իր մոտ կանչի, որ կարգի բերի»:
Էդուարդ, 23 տ.
Գտի՛ր նոր հետաքրքրություններ` լող, պար, ֆիտնես կամ ուղղակի մարզասրահ այցելիր: Կամ էլ սկսիր Cosmo (Cosmul) անունով շնիկ պահել :)
Հ.Գ. Հիշում եմ՝ ընկերներիցս մեկը մի անգամ ասաց, որ տղամարդուն շատ մոտ պահելու համար հարկավոր է միայն մի բան՝ նրան ազատություն տալ: Ինչքան ազատ լինի նա, այնքան ավելի արագ կշտապի քեզ մոտ, հավատա՛:
Լուսանկարները` ըստ HMI-ի
