Սկսենք հիմքից. որքան էներգիա ստանալ սննդի միջոցով, որքան էներգիա կորցնել ֆիզիկական ակտիվության շնորհիվ և ինչ ռեժիմով սնվել:

Ըստ Լիանա Ավետյանի

Սնունդ

Խորհուրդ կտայի սննդակարգում ընդգրկել ցածր ճարպոտությամբ պրոտեիններ, օրինակ` ձուկ, հավի դոշ, ձու (շաբաթը` 5 հատ), լոբի, սիսեռ, ոսպ, ցածր յուղայնությամբ կաթնաշոռ և մածուն: Շաբաթական մեկ անգամ կարելի է ուտել տավարի կամ գառան ոչ յուղոտ միս, իսկ ամսվա մեջ երկու անգամ` ոչ յուղոտ խոզի միս: Չափաբաժինը` խաղաքարտերի տուփի մեծության: Ի դեպ, սնունդը պետք է լինի եփած, խաշած, գրիլի կամ գոլորշու վրա պատրաստված:

Ածխաջրերի ընդունումը պետք է սահմանափակվի ամբողջական հացահատիկներով, ինչպես օրինակ` շագանակագույն բրինձ, հնդկացորեն, աճառ, վարսակ և ձավար: Չափաբաժինը` մեկ բաժակ (100 գր): Ճաշատեսակները պետք է պատրաստել բացառապես ձեթով: Հաց խորհուրդ եմ տալիս ուտել օրական մեկ անգամ` մինչև կեսօրն ընկած ժամանակահատվածում: Աղանդեր` թխվածքի, կոնֆետի, շոկոլադի և գազավորված ըմպելիքի տեսքով, կարելի է օգտագործել շաբաթական մեկ անգամ:

Բանջարեղեն և կանաչեղեն կարելի է ուտել օրվա ցանկացած ժամի` ցանկացած քանակությամբ: Միակ սահմանափակումն այն է, որ դրանք չպետք է տապակած լինեն: Եթե սնունդ ընդունելուց հետո քաղցի զգացում է մնում, կարելի է ուտել բանջարեղեն, ինչպես նաև` միրգ (4-5 հատ):

Ընդունած ճարպը պետք է հիմնականում բուսական ծագում ունենա (ձիթապտղի, քնջութի, խաղողի կորիզներից ձեթ), այլ ոչ` կենդանական (կարագ, պանիր, թթվասեր, կաթ): Օրվա ընթացքում թույլատրվում է 7 ընկույզ: Առհասարակ, ընկույզը մտնում է օգտակար պրոտեինային խմբի մեջ, սակայն մեծ յուղայնության պատճառով այն արժե կիրառել զգուշորեն ու չչարաշահել:

Ֆիզիկական ակտիվություն

Լավագույն տարբերակը շաբաթվա ընթացքում 3-5 անգամ մարզումներն են` 30-60 րոպե տևողությամբ: Դա կարող է լինել պար, յոգա, աերոբիկա, լող, քայլք, հեծանվային սպորտ կամ ցանկացած այլ ակտիվություն, ինչի շնորհիվ կարագանա քրտնարտադրությունն ու սրտի աշխատանքը: Ֆիզիկական ակտիվությունն օգնում է կորցնել անցանկալի կալորիաներն ու խթանել նյութափոխանակությունը:

Սնվելու ռեժիմ

Ռեժիմը նույնպես շատ կարևոր է: Այն օգնում է կարգավորել նյութափոխանակությունը, ինչն առաջնային կարևորություն ունի քաշ կորցնելու հարցում: Խորհուրդ կտայի սնվել փոքր չափաբաժիններով` օրվա ընթացքում 5-6 անգամ, յուրաքանչյուր 3-3,5 ժամը մեկ: Ի դեպ, սննդի վերջին ընդունումը պետք է տեղի ունենա քնելուց առնվազն 4 ժամ առաջ: Կերեք դանդաղ (սնվելու միջին ժամանակահատվածը պետք է կազմի մոտ 20 րոպե) և վայելեք սնունդ ընդունելու պրոցեսը:

Լուսանկարը ըստ Shutterstock-ի